一、歌詞創作得獎人

佳作(一)

杜信龍 先生

( 作品)

有魂無體

佇我的身軀內住一個少年家

伊定定佮阮覕相揣 掩掩揜揜玲瓏踅

欲揣屬於阮的家 縛纏的心是烏抑是白

徛佇這臭殼仔體 滿滿身軀的穢涗( ò e – s ò e )

我毋敢講出阮的話 驚人講阮心內有病

啊 有魂無體 心肝慼

為啥物阮有即款的身世

佇我的身軀內住一個小阿妹

伊定定佮阮覕相揣 掩掩揜揜真歹勢

阮作伙欲揣一個家 縛纏的心是天抑是地

徛佇這臭殼仔體 滿滿身軀的穢涗

我干焦恬恬頭纍纍 驚人共阮恥笑刮洗

啊 有魂無體 心肝慼

阮到底是犯著佗一條罪

啊 阮無罪 遐著是阮的一切

現今光明社會 為何袂當來體會

阮是彩色的美麗 你毋是阮的上帝

 

佳作(二)

簡櫻汝 女士

( 作品)

長壽花

長壽花 長壽花 人人叫我長壽花

行路猛掠走若飛 唸歌唱曲逐項會

哺土豆嘛是無問題 問我歲頭有偌濟

人阮半世紀前是 十 十 十 八

長壽花 長壽花 歡頭喜面好做伙

透早公園練身體 打拳練功兼靜坐

長壽花 長壽花 時常讚嘆講好話

謙虛慈善好心地 人人講我是寶貝

長壽花 長壽花 人人叫我長壽花

朋友鬥陣講笑詼 厝裡工課逐項會

線穿針嘛是無問題 問我歲頭有偌濟

人阮半世紀前是 十 十 十 八

 

佳作(三)

藍淑貞 女士

( 作品)

思念阿母

風對遠遠的東爿吹來 吹過山頭 吹過樹尾

吹到阿母塊睏的土地 甘有帶來阿母交代的話

雨對懸懸的天頂落落來 落佇草埔 落佇大海

落佇阿母塊睏的所在 甘是阿母想阮的目屎

思念 親像墓邊的青草

愈生愈濟 愈發愈長 長到天邊 長到海口

拜託溫柔的東風 甲我的思想講乎阿母知

拜託綿綿的雨水 甲我的思念流去阿母住的所在